Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata allanngortinneqarneranik Inatsisartut inatsisaat nr. 5, 11. november 2000-imeersoq.
§ 1.
Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaanni nr. 9, 30. oktober 1995-imeersumi allannguutigitinneqassapput:
1. § 1, imm. 1 imatut oqaasertalerneqassaaq:
" Inatsisartuni naalakkersuinikkut sulineq nukittorsarniarlugu naalakkersuinikkut suliniaqatigiiffinnut Inatsisartuni sinniisuutitaqartunut aamma ilaasortanut taakku avataatigut qinigaasunut aningaasatigut tapiissuteqartoqartassaaq. Inatsisartunut ilaasortanut, partii kattusseqatigiilluunniit sinnerlugit qinigaasimasunut, partiimit kattusseqatigiinnilluunniit tunuartunut tapiissuteqartoqartassaartaaq."2. § 2-p kingornatigut imatut ilassuteqartoqassaaq:
"§ 2 a. Inatsisartunut ilaasortaq, partii kattusseqatigiilluunniit sinnerlugit qinigaasimasoq, partiimit kattusseqatigiinnilluunniit tunuartoq, Inatsisartuni naalakkersuinikkut sulinermini tapiiffigineqarsinnaatitaavoq.
Imm. 2. Inatsisartunut ilaasortap Inatsisartunut kingullermik qinersinermi taasinerit pissarsiarisimasai tamarmik immikkut ukiumut 60 kr.-inik tapiiffigineqartassapput, taamaattoq ikinnerpaamik 50.000,00 kr.-inik.
Imm. 3. Tapiissuteqartoqartassaaq partiimit kattusseqatigiinnilluunniit tunuarnermi qaammatip naaneraninngaanniit. Ukiumi qinnuteqarfiusumi tapiissuteqartoqartassaaq ukiumut tapiissutit annertussusissaannut naleqqiullugu annertussusilikkanik. Qinnuteqaat tunniunneqartassaaq partiimit kattusseqatigiinnilluunniit tunuarnerup kingornatigut kingusinnerpaamik qaammatit marluk qaangiunneranni.
Imm. 4. Tapiissutit atorunnaassapput ilaasortap partiimut kattusseqatigiinnulluunniit Inatsisartuni sinniisuutitaqartunut ilaasortanngorneraniit qaammatip naanerani."3. § 6, imm. 1-imi "§ 2"-p kingornagut ilanngunneqassaaq: ",§ 2 a"
4. § 7, imm. 2-mi "§ 2"-p kingornagut ilanngunneqassaaq: "aamma § 2 a"
§ 2.
Inatsisartut inatsisaat atortuulerpoq 1. december 2000, 1. januar 2000-imiit atuutilersussanngorlugu. Inatsisip atortuulersinneqarnera sioqqullugu aningaasatigut tapiiffigineqarnissamik qinnuteqaatit Naalakkersuisunut nassiunneqassapput kingusinnerpaamik inatsisip atortuulersinneqarneraniit qaammatit marluk qanngiunneranni.
Namminersornerullutik Oqartussat, ulloq 11. november 2000
Jonathan Motzfeldt/
Søren Hald Møller
Isumaliutissiissut (Aappassaaneerinninneq)